得閒寫返篇

個女越大, 每日變化反而不太多, 寫BLOG的篇數少了.

今天個女病咗, 宜家睡在梳化上休息, 我就寫返少少做個"月記"

今個月她:
1. 開始學踩單車, 暫時試過三次, 除了第一次臨尾有少少脾氣, 其餘時間都好有耐性去練習, 看到她開步, 跌低, 扶車, 再坐上位, 再開步....重複又重複地練習, 我好開心佢好認真好努力, 她的單車有點舊動矮, 所以已應承她等佢學識之後就會買架新的, 咁我哋一家就可以係單車徑上飛馳!
2. 鍾意作故事, 早幾個月和她做了許多科學, 呢排她變為喜歡玩扮演遊戲,  和爺爺扮去英國旅行, 扮行山, 扮搭機場巴士, 好好笑, 因為其實好多東西都唔似, 係佢架硬話係就係... :)
3. 教人, 聽老婆講, 阿女有時見到別人唔識一樣嘢, 佢會同人講: "唔係咁架, 要咁咁咁..." 自信心比以前強多了.
4. 懂得直式計兩位加數, 其實係我今個月才知道, 不過她一向對數學的理解也算不錯, 她也明白咩係"雙倍".

天使與魔鬼

甘怡今天又做”禮貌小天使”, 但她說她做得不好, 我問點解, 佢話無得解, 佢知道自己好細聲, 也許是她自己覺得做得不好的地方吧.

今天有兩個朋友仔上來一齊玩, 一個斯文, 一個霸道, 甘怡都話她相處到, 媽媽說明顯兩個樣, 對霸道的她可以跟隨別人, 對斯文的她又可以撩人玩, 咁都好丫, 她有她的待人接物方式. 她作為主人家, 她也懂得讓自己的玩具畀人, 媽媽對她極之讚賞.

今晚早了回家, 但偏偏甘怡今晚對我不太熱情, 只願痴住阿媽, 我只和她玩了兩局UNO, 一叫她瞓覺佢就即刻扭計, 仲講大話, 結果又係打鬧收場, 要媽媽陪瞓先瞓得著.

甘怡的社交

今天見識到甘怡一個新的行為....

今天去了一個PARTY, 甘怡和朋友A玩緊拍波波, 後來她的好友B找她玩, 也是拍波波, 甘怡和朋友A 說: "SORRY呀, A, 阿B 搵我玩, 我唔同你玩啦." 幸好A也沒所謂,繼續自己拍波波, 於是甘怡就好順利地轉玩伴.

Christmas Eve

今天是Chistmas Eve, 我們約了父親, 家姐和芷芊上我們家過節, 一家人有老有幼, 最好的共同活動就是捉棋, 也讓他們知道到底甘怡的IQ同"棋品"是如何.

波子棋和"Corridor"係比較好, Corridor還贏了第一次玩的表姐. 棋品方面, 甘怡係唔輸得, 佢唔介意唔係第一, 但就好介意包尾, 一輸(包尾)佢就會喊, 但係中間的話佢又會"當贏"會開心到跳起.

又同表姐玩電髮機, 兩個女孩子, 明明一個大一個細, 但兩個電完髮都變咗怕醜女, 叫佢哋企定睇下佢哋就跑入廁所照鏡, 又唔畀人睇個頭, 好好笑. 如果她們年紀相近一點就好了, 也許可以成為能談心的對象, 芷芊現在講的韓星也會多一點共鳴.

今天甘怡有人生第一份學校"功課"

只需寫一版"一"字...明符其實"一字咁淺"

甘怡第一次肯自己一個去好朋友屋企玩。

今天是靈糧堂聖誕慶祝會的日子.
表演片段
早幾個星期, 甘怡每晚都說要表演給我們看, 我知道甘怡練得好熟, 也看得出她的自信與投入.

今天也是一個突破的日子
表演過後, 和甘怡的同學們午餐, 因為天雨, 下午原本安排了的戶外活動去不了, 我們本想行街購物, 但甘怡和她好朋友玩得興起, 依依不捨.

媽媽問甘怡: 咁你去朋友屋企玩, 我同爸爸買D 嘢, 轉頭接返你好唔好?
甘怡沒有多想, 就輕聲答: 好.

我聽到有點驚喜但又覺得係自然發展, 甘怡終於都覺得和朋友玩有時比媽媽有趣, 我眼中,甘怡和她的朋友, 通常都係她朋友話事, 甘怡成日被佢"點", 但今天也見到她朋友懂得照顧甘怡的另一面.

我和老婆意外地得到兩小時(也不能打攪別人太耐)的拍拖購物時間.. YEAH!

第1535日

(想不到標題, 用了甘怡出世至今的日數)

睇返爺爺寫的日記, 仲多過我係呢度寫BLOG, 都要總結一下呢個半月甘怡的進步.

甘怡大個女了, 有時她唔肯畀我睇到佢換衫和去洗手間了, 一向跟她說五歲她就不可以再入男廁, 感覺和她的距離又遠了一點.

她鍾意捉棋, 除了不用腦的飛行棋, 她也喜歡波子棋, 四子連橫, Corridor, Abalone連MasterMind她也會主動撩我們和她玩, 四子連橫她差D, 但Corridor有時我們也真的會輸給她, 波子棋她也經常第二(三個人玩), MasterMind (簡化版) 她也能夠五行內猜到, 我們都覺得她算是聰明和有耐性去捉 (不過, 有時都扭計要我們讓一下)

學術方面, 在媽媽天天的努力下, 中英數我覺得都幾好, 當然, 因為學校也不是太強調學術方面,媽媽可以按甘怡的興趣和能力去教, 不用為分數而摧谷‧不過, 恐怕到了小學就會有困難, 因為阿女不能受壓力.

阿女似乎係一個科學家, 也喜歡太空(還是小朋友都喜歡太空?), 啱哂我, 我好鍾意同佢一齊做實驗, 有些實驗我細個都無做過, 只係睇書知道個結果, 現在好像給自己機會重拾科學和天文的樂趣, 做了鹽結晶實驗, 做到第三次終於成功, 也做了"汽水", 一TAKE過, 不過味道太難飲, 試飲完就倒了. 也做過電池的實驗, V我用"一碗飯"做比喻, 串聯和並聯的分別"分享"嚟講點解燈炮會光和暗.

第一次和甘怡睇電影也是和天文有關, 看了3D 的行星天氣, 她覺得好迫真, 仲想叫埋媽媽一齊. 但叫她睇其他卡通電影, 她又話唔想.

甘怡開始學習"金錢"的概念, 開始畀佢自己去畀錢, 叫她去買飛玩灘位遊戲, 她不懂得開聲, 人哋也看不到她, 直到其他人都買咗飛之後, 才留意到這個人仔, 好在最後佢都靠自己買到飛. 不過我們也會向她講屋企的財政, 她明明地, 不過我擔心會不會令到她太緊張金錢呢?

甘怡也開始唔怕我了, 她會挑戰我和故意激我, 不過我一D 都唔嬲, 反而覺得她有點急才, 最近一次我叫她"快D 食飯, 我趕住返屋企睇波", 她竟然說:"等我阻止你睇波先", 真係激死.