第一次睇超聲波

今日請咗假陪老婆去睇我哋心儀嘅婦科醫生.

佢係一個女醫生, 係個朋友介紹嘅, 感覺都幾好, 令我覺得佢係D 細心嘅人, 佢先問咗D 病歷, 然後同BB照超聲波, BB大個咗好多啦, 呢次佢同我哋照哂手手腳腳, 應該D 手指腳指數目應該都齊嘅, 跟住又照咗心, 胃, 腎, 大腦, 小腦, 尾龍骨, 醫生話全部都「未睇到有咩問題」, 咁又係, 都只係三個幾月, 不過so far so good, 應該都無問題嘅。

佢今日pose面向前面, 雙腳交叉, 雙手好似舉手投降咁, 照多幾張相之後又雙手交叉, 好似想擋住鏡頭咁, 或者佢怕醜啩, 不過我同佢都見咗面成30分鐘, 我都好感動啦, 做爸爸的感覺比之前更實在。











比較好笑嘅係, 我問醫生, 老婆個肚大小算唔算正常, 佢好快就答我:「佢呢個肚腩嚟架唧。」哈哈! 我諗老婆大人真係要忍下口啦, 醫生話要食少D 糖份同starch, 可以飲豆漿... 我要做惡人管下佢!