呢個係我新開的一個Blog, 因為我又有新攪作!!
係2009年1月11日, 我同Nicole去咗睇醫生, 終於証實Nicole成功有咗BB啦! 宜家係5週,預産期係9月12日。 (希望佢唔會係9-11走出嚟啦)
Nicole講返畀我知, 我一聽到醫生話佢有咗我就即刻露出一個開心嘅笑容, 咁當然啦, 我想做爸爸都一段時間啦嘛, 所以呢個好消息實在令我太高興啦!
我哋全日都好開心啦, 有好多無聊嘅幻想啦, 無聊到寫BLOG時都已經唔記得咗! HaHa...
又討論過搵醫生同醫院嘅問題啦, 又諗錢嘅問題啦, 嚟緊嘅日子又要再緊縮D 洗費啦。
到夜晚, 我好急不及待同阿媽講呢個好消息, 但上到娘家又唔知講咩好, 係度風花雪雨完一輪都唔知點講好, 想簡簡單單好似我話結婚時咁單刀直入宣佈, 又想話今年佢哋知今年要"派多封利是"。
最後, 係阿媽想約Nicole去醫院探我的嫦姑姐嘅時候, Nicole就話:「唔知我老公畀唔畀我去探喎。」
我就乘機話:「咁你唔適合去醫院嘅。」
阿媽非常醒目咁即刻笑笑口咁問:「願聞其詳。」
我就將個喜訊講咗出嚟啦, 阿媽即刻提阿爸唔好同人講住 (但其實我仲擔心阿媽自己周圍講!), 佢即刻封咗封利是畀我哋, 恭喜我哋。臨走, 我係阿爸面前講咗聲:"爺爺", 佢即刻笑到見牙唔見眼呢! hahaha!
繼2007年結婚, 2008年搬屋, 我哋兩個2009年又有新Project啦!!
