無聊事

七色襪
買了一PACK七隻色的襪, 問甘怡星期一著邊對, 佢指咗藍色, 星期二呢? 佢指咗另一對...如是者...星期一至星期日佢指咗七次但係無重覆. 我覺得幾得意同佢真係明星期幾的概念.

皇帝的VV
有一天Nicole想甘怡再試返戒片, 就同佢講如果佢識得自己去廁所呢, 就有糖糖食,...
於是乎, 甘怡就肯唔著片, 但轉個頭就話自己要疴尿, 仲即刻除褲添, 坐咗係廁所五秒, 佢就話痾完, 但無音樂喎, 咁即係無痾到啦, 媽媽睇完就話:"廁所無尿尿喎", 甘怡堅持話有, 媽媽話你伸手摸吓, 佢又真係伸隻手入去廁所, 跟住堅持話有, 要食糖糖! Nicole被佢激死, 當然無畀糖佢食啦, 仲話佢唔應該講大話!

「放學媽媽接」

「放學媽媽接」係呢排甘怡的口頭譂, 直頭係無嘢做就會自然自語講: 「返學搭校巴(有時有呢句), 放學媽媽接」。甘怡仲未鍾意返學, 只係著緊放學有媽媽接返, 試過同佢講返學有歌唱, 有舞跳, 有餅食, 佢都會話"無,無,無"。

昨天買了部"校巴"車仔畀佢, 其實係佢係玩具鋪見到話要, 咁咪買囉。晚上我同佢講: 「有時你問"係咩嘢?"爸爸都可能唔識架, 但老師會識喎, 不如你返學學到D 新嘢, 爸爸識的東西都係老師教架, 老師教爸爸, 老師又教媽媽, 宜家老師又教女,咁你學識咗要教返爸爸喎。」甘怡細細聲咁答:「好」。

不過後來扭計時甘怡又再話:「唔返學,唔搭校巴」

驚驚和痛痛

未到萬聖節,甘怡已經好似過緊萬聖節, 點解? 因為佢成日都話:"驚驚", 又驚爸爸, 又驚返學, 媽媽行開佢又話驚驚, 我諗上篇BLOG話佢適應到返學係寫錯啦.

第二句最常講的說話就係"痛痛", 因為佢被蚊咬後的傷口, 好耐都唔好返, 佢成日攪個傷口, 結果埋唔到口, 咁咪痛囉, 但有時我覺得佢係想媽媽注意自己, 因為有時唔提佢貼"布布(膠布)", 佢一直係無嘢, 一話要貼布布, 佢就即刻變臉到好慘咁, 係咁叫"布布", 唔貼的話會越喊越大聲。

我覺得阿女唔識/唔享受同其他小朋友或老師相處, 所以唔想返學,可能都同佢太痴媽媽有關, 可能要長D 時間先適應到..

甘怡自己搭校巴返學

呢兩日甘怡都係自己搭校巴返學.

星期一, 遲起身, 又拖拖拉拉, 好彩最後都趕得切, 甘怡上車竟然無喊, 反而係媽媽喊住打電話畀我報告. 放學落車甘怡見到媽媽無喊, 但扭計, 老師話佢無乜喊.
不過, 下午甘怡講嘢就細細聲, 又痴阿媽, Nicole話佢可能嚇親. 晚上好抗佢我, 我接近佢佢就即刻瓜瓜叫... :(

星期二, 今日出奇地自動自覺落床, 大致上都無扭計同慢手腳, 準時去到等校巴.
上車後有D 扭計, 但媽媽在車外望佢, 佢就無喊, 但扁扁咀.
老師話甘怡唔想玩學校的爬地遊戲, 最後係地扭咗幾下; 係"操場"玩時, 老師見到佢望住架三輪車想玩, 但老師睇住佢又唔玩, 老師唔望佢佢就即刻跑上車玩.

似乎甘怡都適應得幾快, 可能明天就唔喊啦....

古惑的甘怡

今日放學, 甘怡係商場突然跪係地下, 好似D 人朝聖咁, 媽媽就叫佢起返身,
問: 「邊個教你咁做架?」
女:「爸爸」
母:「爸爸幾時咁教你架?」
女:「...」
母:「咁我打畀爸爸問吓啦, (扮) 喂, 爸爸, 你有無教甘怡跪係地下呀? 無? 哦, 拜拜。」
母:「爸爸話無教過你喎。」
女:「(扮), 喂? Hello, 爸爸, 哦....無 (高八度)...」
母:「係咪阿女你自己學架？」
女:「係...」

第二天自己上堂

放完中秋, 又要返學.

甘怡都仲係拖拖拉拉唔願出門口, 到咗學校, 照舊先玩一陣, 好地地, 但一聽到早會鐘聲, 佢就即刻好似樹熊咁攬實媽咪, 老師走過來叫媽媽放手, 媽媽放開手証明係甘怡自己攬實, 唔關媽媽事, 老師唯有好狠心咁分開甘怡的手指仔, 從媽媽身上抱走佢, 媽媽就即刻離開課室.

到放學, 媽媽排第一個接女, 偷看到甘怡無喊, 只係目無表情咁, 老師一叫甘怡的名字, 甘怡就即刻望到媽媽, 跟住就喊住走去媽媽到, 媽媽攬幾吓佢就收聲唔再喊啦.

第一天自己上堂

今日係第一天媽媽唔可以陪女上堂，起身後甘怡已經拖拖拉拉咁，又話要玩字母，又唔願擦牙，攪好耐先出到門口。

原本估計媽媽會喊，但她說只是有少許眼淚，送了甘怡入課室後，也能狠心轉頭就離開課室，偷看了女兒一眼，見到佢喊，然後老師就抱著她去引開她的注意力，之後媽媽就被請離開。

放學接女，甘怡也是在喊，很是可憐，她見到媽媽但又未輪到佢走，甘怡算乖無離開坐位，到媽媽入去接佢，佢先至喊住去攬媽媽。

問老師，老師說只有食小食時甘怡先暫時唔喊，但問阿女鍾唔鍾意返學，佢又會答＂鍾意！＂真係唔知佢點諗。