甘怡得咗!

甘怡IN咗幾間幼兒園, 由第三志願IN到第一志願, (啓思, 迦南, 靈糧堂)都收, 都幾開心, 覺得佢都幾醒目 (生女讚女乖! haha), 最衰因為取錄時間問題, 我哋三間都要交留位費, 有少少蝕咗咁囉!

靈糧堂其實係GROUP INTERVIEW, D 老師只係問咗家長個小朋友日常生活, 邊個湊之煩, 其餘都係一班人做不同的活動, 唱歌, 抛波波, 觀察D 小朋友,都唔係好知佢哋點揀人, 不過阿女都幾好, 識得抛返個波波畀老師, 個波淥遠咗又識得MOU低去搵, 老婆話見到個副校長即刻係本薄度寫咗D 嘢, 覺得係因為咁所以收咗佢喎....唔知啦, 最緊要老婆開心啦, 因為佢自己當年都係讀靈糧堂, 所以當靈糧堂係第一志願, 宜家啱哂佢心水啦!

魔術

甘怡變魔術, 首先用左手拿起隻杯, 然後話唔見左(用右手同口形話無), 再左望右望, 再向下望, 然後又望住你話無(手依然拿著), 不知杯在那裡.... 此刻, 爸爸搶了甘怡的水杯, 放在桌上, 甘怡依然周圍望話無. 爸爸忍不住了, 同甘怡說杯杯在這裡, 甘怡用很驚訝的眼神望住隻杯, 再望下爸爸..."是你取了, 你真的不對". 爸爸無耐的說.."是爸爸取了不對, 真對不起"

15 個月大

女大得真快, 越來越多計, 也令爸爸變了醋王. 今日, 呀女的新野便是由外爬入嬰兒床, 雖然未成功, 但已經令我感到有點意外. 手指還學抓鼻洞, 激死人! 有時, 女又要媽媽陪玩兒童遊樂設施, 用手命令媽媽, 又用笑去蓋上不聽話的時候. 只是每日睡覺都花了爸媽不少的時間, 又要陪睡, 廳有燈, 又跑出去. 現在, 唯有一家早睡早起, 可能對爸媽都好. 女兒, 媽媽的世界已經圍著你走, 你已是媽媽的中心了, 你做的每一件事, 媽媽都而你為榮, 只因你是甘怡. 將來, 媽媽也會繼續培育你, 希望你為自己人生有所成就, 也為自己為榮. 媽媽永遠愛你.

BB Class Interview

最緊要的3間Nursery已經in了, 心情也放鬆了一點, 因為現在都有2間收, 等年尾便知靈糧結果. 開頭, 好驚呀女沒有書讀, 又怕佢沒有學校收, 現在有了, 感覺較實在. 無論甘怡讀那一間, 都有少少天意. 如果開正呀女的題目, 勝數便高, 狀態唔好, 又好難講. 唔知有世襲又有沒有好處...一切由天呢..甘怡, 媽媽知你已經努力了, 靈糧最後結果如何, 便要看看緣份了.

每本最少講5次

呀女呀女好鐘意睇書, 但一定要媽媽講, 爸爸講唔得. 開始時, 媽媽以為自己講故事好動聽, 現在覺得有點疲累. 甘怡喜歡的書不多, 每日重覆又重覆, 未到那一頁都知做什麼手勢. 例如: 每天早上看3本, 每本最少講5次. 媽媽已經懂得背書, 而甘怡也懂得用手指指, 做動作, 只是不願意自己看.

又大一歲啦

又大一歲? 那個人是甘怡的爸爸...上星期六生日我生日, 早一晚我回到家收到"甘怡寫"的祝賀說話:"Daddy 生日快樂", 心裡很甜, 想像將來甘怡親手寫或者畫生日咭給我...

自己又大一歲, 總會有些檢討, 尤其過去幾個月來, 甘怡開始識行路, 又開始聽得明媽媽和爸爸的說話, 滿足感很大, 但有時自己又好像真的當甘怡已經大個女, 我經常想和她講道理, 因為Nicole常說「甘怡識聽...」但其實畢竟她只是十五個月不到的嬰兒, 有時我會嬲甘怡唔聽話, 好想"教訓"她, 有時我又覺得自己的要求太高, 會隨她做喜歡的事, 實例就是, 我想和甘怡一齊睇書, 首先她總是優先選媽媽去讀, 就算有時她願意坐在我大脾上一起睇書, 讀了幾頁她又會走開, 或者我讀得不夠動聽吧, 但連一本書也讀不完又令我覺得甘怡對我的耐性太少, 迫她繼續佢又喊, 讓她走開我又感覺不好, 我也想和她多相處呀! 結果就是她走開而我對她的心機更少.

我對D 唔講道理的小朋友真是無符.

甘怡十四個月+幼兒園面試

甘怡一歲後轉眼又兩個月, 佢又識多咗好多嘢:
1. 識得玩BB公仔, 會餵奶同抱個公仔;
2. 識得推車時轉方向, 之前只係會直行;
3. 識得玩D 車仔, 之前坐咗上去要人推或只識向後, 宜家識得向前...不過未識轉駄;
4.  開始認到D 動物e.g. 鴨鴨, 老虎, 班馬, 貓貓, Giraffe, 兔仔
5. 識做的動作: HI, BYE, 飛吻, 舉手, 雙手放係頭度, 收埋 (對手係後面), 握手, 拎, 畀, 執, 放
6. 佢嘅社交能力有所進步...不過都係唔鍾意男人, 後生男仔佢就識怕醜.

之前訓練佢執玩具, 發覺我一開始要求佢"自己執"係錯嘅, 只會攪到佢大喊。宜家係拎件玩具畀佢, 叫佢放返入個玩具箱度, "幫爸爸放好D 玩具得唔得呀?" 甘怡就會好乖咁幫手.

咁甘怡識咗咁多嘢有乜好處呀? 最重要當然係要甘怡學識多D 日常見人會用到動作 (e.g. Hi, Bye, 飛吻,握手...) 其次有D 係媽媽根據D 幼兒園面試有用嘅行為去教, e.g. 認圖畫, 執嘢, 睇書... 教咗幾個月終於有D 成績啦!

呢排經常帶甘怡去不同的幼兒園參觀, 順便當去遊樂場, 佢都好鍾意玩入面D 玩具, 尤其可以坐嘅車車同Cooking, 而呢兩個星期都有去面試, 第一次面試學校問得比較簡單, 只係睇吓甘怡對人叫佢個名有無反應, 叫佢畀嘢老師佢聽唔聽話, 有媽媽陪住甘怡都有D 扭計同怕醜, 但最後都做到.

今天去了第二間, 呢間就難好多囉, 一開始就拎D 圖畫 (e.g. 波波同魚魚)問甘怡"呢個係咩嘢架?" Nicole即刻講: "我個女係細B (即年紀比同學年同學細), 宜家未識講嘢." 咁老師就無再問呢樣, 改為MC題, 但第一批題目係考顏色, 呢樣我哋平時無乜教, 心諗咁難架, 點知甘怡唔知點解四次都選啱咗老師問的那個顏色的玩具! 之後叫佢搭起D 圓柱型玩具, 甘怡諗都唔諗就搭起二層, 仲好似好熟手咁, 平時通常都放唔穩架嘛! :D 跟住叫佢放個細圓筒入大圓筒, 呢樣簡直係甘怡強項啦, 所以亦都好快手攪掂! 超叻呀! 之後老師就問一D 家庭嘢, 周末去邊玩, 我哋當然答(強調)我哋去好多地方, e.g. 屯門環保園, 愉景灣, 成個面試甘怡都好乖, 臨走叫佢拜拜同飛吻又係即刻做到, 我哋都好開心, 希望會收甘怡啦, (不過唔收我都好滿意甘怡的表現啦!)

P.S. 阿女終於出第三第四隻牙

參觀幼稚園

近日都是忙呀女的幼兒園, 除了報名外, 便是參觀了. 3X多年沒有踏足幼稚園, 感覺很新奇, 而較難忘便是牟利與非牟利的分別. 當然, 大部份的牟利都是有外藉老師在門口揮手, 再加上較新的玩具而已. 反而, 非牟利的香港老師較親切及主動, 仲話一般都收, 令人放心, 還教我如何教小朋友, 很好人. 而牟利的便是自由玩及自由試堂, 並沒有任何交談, 兩者分別很大. 而牟利的都是名校, 家庭背景較相約, 但很商業化. 非牟利的較有愛心, 有誠意...但對升上小學的準備可能沒有太大保障, 小朋友的家庭背景較不一樣. 當然, 現在只是去了很少的學校, 到呀女約見完再考慮還可以. 不過 , 經常在會所見到很多公主王子欺負呀女, 自然幫呀女出頭, 有時還被對方家長罵, 真是很想說: 你個女遲早比人打, 家長你比心機唔講道理! 你個女動手推甘怡落地欺負人在先, 還說是甘怡錯, 罵我是野蠻人, 真不希望和她們一間學校!

大喊十

最近睇完「公主嫁到」, 其中一句對白係「青筋伴鼻樑, 無事喊三場。」我覺得完全可以用嚟形容甘怡嘅樣子同表現...佢個鼻樑真係有青筋, 而佢又真係無事喊三場!!

佢真係好鍾意喊, 無論大小事情佢都喊一餐: 媽媽入厨房-大喊, 媽媽去沖涼-大喊, 我返屋企開門嗰刻-大喊, 呢D 事情已經發生咗成年啦, 佢都仲係好似第一次遇到咁, 好似好驚咁大喊特喊, 雖則D 人話佢唔識講嘢唯有用喊嚟表達, 但好似有D 過份咗囉, 就算媽媽近在咫尺, 只不過媽媽唔抱佢, 或者佢唔能夠攬住媽媽對腳, 佢就會大喊, 好似媽媽唔要佢咁, 就算我抱佢都會扭落地要去搵媽媽。

唔係我無耐性呀, 其他人都同意甘怡真係好"痴"身架, 連媽媽有時都話「阿女, 你唔好係又喊唔係又喊啦, 就嚟頂你唔順啦。」

呢排開始訓練佢,
1. 要揮手BYEBYE同HELLO: 我每天出門同歸家都要佢BYE同HI, 佢成日都扮聽唔到睇唔到我, 要媽媽抱住佢行到我面前佢先好不情願咁揮一揮手;
2. 爸媽食飯佢唔可以扭計同喊: 呢樣要好似訓練動物咁, 佢唔喊就獎餅餅佢食, 昨晚先開始試, 都WORK WORK哋;
3. 執玩具: 每晚要執好其中一類 (書, 字咭, 玩具) 。

其中3. 都有少少成果, 叫佢執佢都唔喊肯執, 雖然執執吓會拎返D 玩具出嚟, 但提返佢佢都幾合作, 希望其餘兩項遲D 都有成果啦。

咖喱飯

今日, 同甘楓爸爸去大快活食咖喱飯, 爸爸不小心將咖喱汁飛入媽媽眼. 咖喱汁又熱又辣又刺眼, 我立刻用紙巾蓋眼, 表現痛苦, 甘怡立即大叫大喊, 直致我表現平安為止. 這一刻, 我同老公才知道甘怡是多麼緊張媽媽. 雖然, 佢有時都會望下我, 看我的反應再作反應. 但今次之後, 甘楓話不可以容易令媽媽不開心, 因為會影響甘怡, 而爸爸希望我們的家要越來越正面, 因為甘怡第一. 甘怡, 你看爸爸媽媽多疼你!

食

呀女很喜歡同我分享, 包括她的早餐 包包, 水水, 飯飯. 每次她食, 我張口時, 她都餵我, 感覺很親密. 分甘同味就是如此吧! 但近排呀女食飯特然很麻煩, 喊足30分鐘, 喊到疲倦便不吃飯, 要睡覺....真麻煩...我是不容許你不吃飯的! 媽媽加油!

幸福大哂

老公成日話我身在福中不知福... 昨日, 下了很大的大雨, 天又開始黑, 路又滑. 老公一傘遮我, 一傘遮甘怡的車, 我當然雙手推車, 我覺得很幸福及溫馨. 甘怡是我的命根, 我是老公的命根 (老公話) 而我又是女兒至愛 (她不容許任何人擁抱媽媽), 現階段是很幸福. 珍惜現在, 希望這樣的幸福會持久啦, 呀女一拍拖很難講~ 所以, 一定要寫下, 免日後忘記.

小公主

甘怡一歲後, 學習能力強了很多, 多了互動, 佢能明顯表達自己的意願, 我99%都樣她決定, 讓她更有信心. 昨日, 甘怡又等我沖涼, 今次, 我一出來, 她便遞上拖鞋, 再遞衫褲, 乖得嚇怕我. 因為, 我從不要求/教女兒這樣做. 她明白很多媽媽的指示及爸爸的要求. 今時今日, 她仍然不會痴爸爸. 爸爸當然不是味兒, 希望爸爸的嚴厲管教, 甘怡有一天會受落啦. 而媽媽太愛甘怡了, 甘怡是媽媽心目中的小公主. 而小公主現正學習自己食飯, 並已懂得從一堆衣服中找出襪子來, 我對甘怡公主的自理能力充滿信心. 媽媽錫哂你!

甘怡一歲啦!

甘怡轉眼就一歲了, 我們替她攪了一個生日會, 其實Nicole最初無諗過攪生日會, 但係我就好想, 爺爺嫲嫲出錢, Nicole出力之下個生日會就好順利咁完成啦!

我們邀請了各方好友卅幾人參加, 主要都係請D 有BB的朋友啦, 等媽咪們可以交流心得, 又讓BB們可以同其他小朋友玩。我叫咗爺爺嫲嫲, 家姐一家, 十個家庭, Nicole就叫了她的爸爸, 九姨, Nicole的姐弟妹都一家大細有到齊, 好熱鬧呀, 未試過咁多親友JAM埋一個活動裡面。佢哋都有送禮畀甘怡呀, 我的姑姐更親手造咗條裙仔添!  真的多謝各位親友對甘怡的愛錫!

成個生日會的重頭戲就係個三層的生日蛋糕! 我咁大個仔都係第一次買嚟食! :D 個蛋糕個款係老婆係網上看到然後叫一間蛋糕公司訂造的, 係朱古力加香蕉味, 雖然甘怡仲未食得, 但佢剛剛係生日會前學識"吹"呢個動作, 佢自己有吹candle架, 不過最後支臘燭係被Eunice吹熄嘅! :P 我都唔識切, 最後由蓮姑姐同Connie幫手分畀大家食, Thanks!

我哋仲叫咗一D 到會, 大家都食得哂, 我仲驚大家食完飯會飽添, Nicole仲係網上訂咗D 回禮禮物畀D 小朋友玩, 有玩具槍, 有髮夾, 筆等等. 小朋友們都有D 交流, Eunice同Emma一齊食蝦條, 甘怡又有和芷芊及Emma玩, 至於還在手抱的BB呢, 就他/她們的父母傾下計, 影吓相, 大家食飽就帶咗D 小朋友去遊樂場玩 (我睇唔到因我要留係function room), 個個都留到最後五點幾先走, 証明雖然無咩特備節目, 但都無悶親D 親友啦!

在此再次多謝各位的參與!

媽媽特別訂製的生日蛋糕

和表弟及舅母合照

P.S. 下年...未必再攪咁大啦, 因為都唔平, 或者隔一兩年攪一次啦, 物以罕為貴嘛!

甘怡被發現是女孩了

甘怡終於開始有人發現她是女孩了, 全賴一架粉紅單車. 每天, 穿著全身粉紅, 都是被叫弟弟, 我也不想再去解釋, 都一年了, 算吧~

講真, 個女好好動, 沒有一時停, 悶都在屋周圍行, 一時做體操, 用手扶枱, 雙腳離地. 不停做"不乖"的時, 引媽媽注意, 媽媽一罵便笑. 我覺得甘怡是很聰明, 又很活潑, 尤如馬騮一樣, 內裡是男孩子, 性別是女, 湊甘怡一點也不容易. 每次媽媽罵你, 你都扮聽不到, 又喜歡激媽媽, 你一歲都未到, 來年還最少18年, 不如你來教媽媽如何指引你成長?

應該畀幾多空間個女?

甘怡媽媽做決定時有兩種方法, 1. 跟據大人認為好的想法去做, 例如食飯訓覺時間要固定. 2. 跟據甘怡想法去做, 例如甘怡有時想玩又唔眼訓, 係床上爬來爬去, 咁我哋又會跟從甘怡的意思去做.

有時我真的無所適從, 又唔想太專制, 又唔想太放縱, 我覺得都係時候定個標準出嚟. 如果唔係甘怡一定會識行灰色地帶, 攞盡著數.

唔想寫呀女咁黑人憎

個女又激我! 平時都唔比佢放野入口玩, 她也非常清楚. 每次, 她為了激我, 都咪咪嘴笑, 眼尾望下我, 保證我嬲, 再放玩具入口. 而每次, 我都會話佢, 出手阻止, 她便會笑笑口. 今日, 再厲害一點, 佢先叫我望佢, "a" 一聲, 望實我, 再放玩具入口, 你話甘怡是否很黑人憎!

昨日, 甘怡沒有食哂飯, 我便用麵包引佢, 將飯夾在麵包內, 佢照食. 今日, 我用佢致愛的餅, 將餅放在飯上餵佢, 佢用手取匙上的餅放入口, 唔食飯, 我再試! 今次, 佢用手指指著成筒餅, 望都唔望匙上的餅, 堅決食餅唔食飯. 甘怡, 你明天可否有衣食一點, 食哂碗飯?

甘怡識行啦!

經過幾個月來的練習, 甘怡漸漸學識行路啦, 佢開頭無乜信心, 點都要拖住媽媽先肯行, 一無得拖佢就會爬; 後來我哋鼓勵下佢, 要佢由一兩步的近距離開始練習唔拖住, 佢可能都覺得咁近, 又爬又起身麻煩, 佢就開始試下行一兩步, 跟住(其實都好多日後), 就再試遠D, 遠D...佢跌低咗又係會繼續爬, 我就扶佢起身, 再放手, 叫佢行, 又OK喎, 佢漸漸就識得唔洗扶都企返起身; 好幾次我見到佢就嚟跌, 佢又識得座低D 個身, 然後又企返直!

見到甘怡識行真係好開心, 覺得我哋生咗個又叻身體又健康嘅BB女! 做父母嘅最簡單嘅願望莫過於此。

公主皇子病

現在香港流行公主皇子病, 我在會所日日都見唔少, 大多數都是輕度至中度, 有些較嚴重的我已經抱呀女走. 十個有9個小朋友都是被工人湊, 工人當然做工人的各色. 另外的, 都是老人家加工人, 工人的各色更明顯, 因為老人家的威風更厲害. 公主皇子病到處都是, 有時跟老人家交談, 他們都不願多教, 怕破壞關係, 一時又話要交人, 最叻的唔比同其他小朋友一齊玩, 同工人玩. 仲有少數的便是完全不理, 非常恐怖. 每日, 都聽到小朋友..."我..我的...我唔比...我比....我要.....", 真的很討厭. 當然, 仲有非常少數的全職媽媽, 一般的小朋友較乖, 較合理. 日後, 甘怡的世界這麼多病人, 佢又會點, 又如何立處. 我現在已成惡Auntie, 努力識多一點人, 保護個女, 希望呀女不要再比人欺負. 讓甘怡知道什麼是合理及如何一起跟其他小朋友一起玩, 不要以為欺凌是對的!

甘怡十一個月啦!

好開心, 呢排我同佢Friend咗好多! 佢好願意同我玩, 又會挨係我身上, 晚上我又可以"暗"佢訓覺, 佢唔再一定要媽媽陪, 佢訓覺都算乖, 就算未訓著佢都無爬來爬去, 只係玩手指, HEA一輪佢就會自己訓著覺。

成長方面, 佢學識咗落SOFA要用腳落先, 我哋唔洗再擔心佢會跌落地, 有嘢扶住的話, 佢試過自己企係件玩具上面攪DVD機都企得好穩陣.

呢幾日聽到甘怡的朋友仔識行啦, 原本那男仔仲遲過甘怡爬, 估唔到佢仲快過甘怡識行, 其實我哋估甘怡都快識行架啦, 今日下午係爺爺面前行咗六步添! 不過可能佢無乜信心, 遠少少佢都係選擇爬過去, 所以我決定同佢練多D 自己行, 佢今晚都有自己行, 睇得出佢係怕跌, 要鼓勵佢多D 先得!

老公話不如生多個

大家點睇?! 我就話壓力好大... 資源又不夠, 到時好煩. 拿層樓去換錢, 太大風險, 又太偉大. 錢呀錢, 做人真麻耐! 甘怡太疼太痴媽媽, 老公話生多個, 教下個女分享 (包括媽媽的愛, 爸爸的錢). 人地話千金難買少年窮, 我話現在已經有點窮! 女呀女, 媽媽永遠疼愛你, 不用分, 不用擔心. (講真, 我都很喜歡大肚生仔, 做媽媽)

不再雙失與妒忌

BB的變化真的快亦都難以觸摸, 9 天前寫的BLOG今日睇返又覺得唔 多符合事實。

呢幾日甘怡又無咁痴媽咪, 又再能夠同我單獨相處, 也願意由我陪她睡覺, 一切好像和之前相反了, 其間我又無特別做D 乜嚟討好佢, 甚至也有鬧過佢添, 但呢次佢又無乜負面反應...奇...

Re: 寂然世界: 家務

呢排"港孩"的問題又再被討論, 睇到一篇文章, 都幾好, 雖則有D "係人都知啦", 但都值得參考.
寂然世界: 家務

其中有段:
---------
當多數人家中都有一兩位自理能力很低的小朋友，不久之後這地方的人口素質就會發生變化，新一代除了依賴父母，也會依賴學校，依賴公司，依賴政府，他們從來 不會依靠自己，因為他們在這方面的觀念都很薄弱。
---------
我十分贊同, 為咗小至我自己屋企, 大至全港將來的命運, 我都要訓練甘怡做一個識自己照顧自己的人!

雙失與妒忌

我覺得我係屋企越來越無地位, 我不再是丈夫, 也沒有人當我是父親, 失去了雙重身份, 有時感覺好像自己一個似的。

甘怡真是痴身, 有時我覺得佢痴媽媽到好像世界上只有媽媽一個, 也彷彿媽媽是她擁有的, 和太太擁抱固然"罪大惡極", 就算我身處 (不論坐或企) 她和媽媽中間, 她也會放聲大喊, 跟著用手拍我, 然後會用手推開我, 如果佢係仔, 就好似同我「爭女」咁! Nicole次次都叫我就吓個女, 然後極速抱起甘怡, 真係令我十分妒忌同無眼睇。

每朝起床, Nicole通常遲少少起身, 甘怡見到我行來行去是不會望我一眼, 到她發現媽媽醒了, 她便會開始叫, 開始喊媽媽, 真是勢利!

叫爸爸媽媽

終於叫爸爸媽媽了, 但很快樂的感覺卻沒有, 只是覺得有點煩, 因為甘怡是不停叫, 你唯有不停比哂所有注意力給她. 最攪笑都是發音不準, 媽媽變"咩咩", 我不停改正她, 因為媽媽是坐"正"的, 當然努力下, 始終有成果. 近日, 又忙於教育甘怡, 因為要準備考幼稚園, 時間真快, 好快又要交學費, 點解養一個小朋友咁貴!

甘怡十個月

話咁快甘怡已經十個月大啦! 呢個月D 變化多咗. 首先佢比之前更靈活, 企嘅時間又長咗, 有時仲會自己企係度十幾廿秒, 又學識爬上樓梯. 有時係club house佢仲會一次過玩兩隻搖搖馬, 又識自己上馬同落馬. 佢都幾有好奇心, 一見到新嘢就會爬去睇, 拎上手把玩一輪. 不過佢好鍾意掉嘢, 拎起手會狠狠咁抛落地。

甘怡好識get attention, , 有時畀D 嘢去玩, 佢會靜靜哋鬆開手由得D 物件跌落地, 要爸爸媽媽執! 又會撥開個窗廉去引媽媽去望佢; 玩騎搖搖馬時又會企定定然後"丫丫"咁叫, Nicole話佢係想人讚佢, 讚佢佢會傻笑架!

佢又好為食, 除咗佢本身的正餐之外, 我同Nicole食飯時佢都會想食嘢, 又識得手指指個BB餅個bottle, 我哋就會餵BB 餅畀佢食, 一食開就唔停, 一唔畀佢就會投訴架啦! 另外我哋發現佢幾鍾意食魚, 有幾次去酒樓食飯畀魚佢食佢都食到津津有味, 又係要不斷咁食, 食完佢都要REFILL架! 咁當然唔可能不停咁餵佢食魚啦, 佢就會扁咀, 扭計, 不過佢又乖喎, TUM吓佢佢又無嘢架啦。

唔知同食魚有無關呢, 佢終於出牙仔啦, 所以成日食手指。呢幾日佢又好多聲出, ee or or, 丫丫, el el, 因為佢食日都el, el, el咁我哋笑話佢個英文名應該叫"ELLA". 佢有時D 發音好似識講嘢咁架, 但SO FAR都未真係講到一句說話。

人際關係方面, 佢有明顯進步啦: 同其他BB玩多咗, 又會讓D 相熟嘅BB仔玩玩具先, 還到陌生BB搶佢嘢佢又唔會WE WAH鬼叫, 只會叫媽媽主持公道; 對大人佢亦friendly咗, warm-up時間短咗, 亦願意畀人抱, 有次去西貢, 所有姑婆 姑媽, 姨婆, 爺爺抱佢佢都好乖, 媽媽行開咗都無問題! 佢也多咗同人笑, 大家都讚佢好玩咗好多!

搞錯

人地話第一次比bb叫媽媽是很快樂, 很甜的...而我已經被人叫了兩次媽媽, 但是是由兩位不同的bb叫, 並不是甘怡. 第一個bb剛剛學會分男同女, 每次見到女的, 都會叫媽媽..., 男的叫爸爸, 她的媽媽也沒辦法. 也好, 我還像個女人. 而另外一個bb, 由外婆照顧, 每次見到我都高興地爬過來, 然後叫媽媽! 媽媽! 我也會識趣的抱抱他. 他一歲還未到, 但媽媽真的可以弄錯嗎? 在我眼中, 我跟他的媽媽一點也不像, 而外婆每次只可讓他待一會便把他抱走. 到底甘怡何時才會叫我呢? 我希望她不會搞錯啦!

甘怡九個月.

(哈....寫BLOG越來越少添,  甘怡滿咗九個月時本身已經想寫吓Blog, 但人懶無寫到.)

甘怡頭髮明顯地係多咗D 啦,  希望再生快D, 咁先似返個女仔架嘛! :) 佢又開始對身體好奇, 唔知係咪唱得"head-and-shoulder-knee-and-toe" 多呢, 唱到"eye-ear-mouth-nose"時佢會好得意咁笑架, 佢又會摸我哋塊面, 肚臍, 腳板, 有次佢摸完我D 腳毛之後又摸吓自己嘅小腿, 個樣好似好好奇咁。甘怡D

Nicole日日帶佢去club house, 我哋亦帶過佢去一次play group, so far佢都唔係好同第二D BB 仔玩, 都係鍾意自己爬來爬去, 或者推住D 玩具手推車 (約尺半高)行來行去, 佢又鍾意玩"SIR滑梯", 每次佢都笑架, "SIR"完佢仲想爬返上去添, 但當然爬唔到啦, 但D 姿勢好攪笑! :)

佢宜家都算活動自如, 不論咩"地形"佢都爬得到架, 佢多咗個表情就係每次扶住媽咪對腳企起身之後都會望住我笑...個笑容係有D..."得戚", 好似想講:「你睇? 我幾叻」/「你睇? 媽咪幾錫我。」咁架...好鬼奸..

甘怡呢兩日心情唔好, 又重新咬手指, 見到爺爺公公, 鋪頭sales (基本上除了我同Nicole之外), 咩人同佢係佢面前講嘢佢都會喊) Nicole覺得佢好似出緊牙仔, 但我又摸唔到, 都唔知甘怡攪乜鬼. 上網想搵吓有咩辦法, 但好似得一個辦法就係"等"...D 人話BB 仔大過識行就會周圍走, 見多D 嘢就唔會咁痴父母, 又會大膽D, 我都有少少放棄嘅心態, 即係放棄要佢唔好成日喊, 由得佢喊都唔話佢, 但亦唔抱佢.
(部desktop壞壞地, 有D 相同video未得閒upload上嚟)

快高長大

近日, 在會所見的"小朋友"好似入讀小學的年齡, 一問之下, 才知是4歲左右. 很多小朋友都長得很高很大, 營養真好, 我便開始懷疑我到時還有能力抱甘怡嗎? 這個現象也說明了為何很多小朋友仍需坐嬰兒車, 只是嬰兒產品公司慢了一大步.
甘怡很有皮氣, 我開始覺得教她是不容易, 她雖然很痴我, 但對其他小朋友一點禮貌都沒有, 我真的不知是她還不懂, 還是性格如此, 希望她不要太男仔頭, 珍惜她身邊的朋友.

同理心

我的寶貝女真懂得哄媽媽歡喜. 有一次, 我在sofa扮不開心, 甘怡竟然取了地上的紗巾幫媽媽擦眼淚, 令媽媽很感動. 因為每次媽媽不高興時, 甘怡都只會對住媽媽笑, (希望媽媽開心返), 這次, 不知是否巧合, 欲令媽媽很快樂.

又有一次, 媽媽扮睡覺, 甘怡更然取了按撫奶嘴放在媽媽嘴, 真的很好笑, 媽媽立即給了甘怡一個很愛很愛的愛的擁抱.

軟禁

甘怡給了媽媽一個無限期的軟禁, 她要一手摸著媽媽, 一手摸著玩具, 令媽媽很困難才做到家務. 而她也成熟了, 扮作受害者. 每次, 坐電梯都會望實陌生人, 當陌生人向她微笑或作出反應時, 甘怡便會立即扮哭, 然後找媽媽, 再用眼神告訴媽媽, 那一個陌生人令她不高興. 既於她已經重覆了很多次, 媽媽決定在電梯內直罵甘怡, 甘怡當然收聲, 扮什麼事都沒有發生過, 而陌生人卻偷笑了出來, 希望甘怡不要再如此! 實在太似媽媽氣弄爸爸的壞行為了! (爸爸說, 但媽媽說沒有).

阿女的"牙力"

今晚餵阿女食奶, 食咗三分之二之後佢唔再食, 同佢struggle咗三分鐘, 突然發覺點解D 奶流到周圍都係架呢? 原來阿女"咬"爛咗個奶咀, D 奶變咗可以倒出嚟.. 阿女呀, 你無牙都咁, 你有牙時會唔會變鯊魚?

1,2,123

One two, one two three. 甘怡左手一件玩具, 右手一件玩具, 第3件點取呢? 甘怡的選擇是用口, 無論如何也不會放棄心愛的玩具. 甘怡還會用手推人, 用手搶人玩具, 用口罵人, 總之, 尤如小惡霸, 一點也不怕人. 但當大人叫她不要放東西入口時, 她便會扮哭, 痴住媽媽. 我相信我的女兒已經不是嬰兒了, 心智成熟, 應該可以返工了! 哈哈! 她還會發皮氣, 扮眼瞓, 用眼睛說話, 講BB話, 有時真有時假, 總之, 又來智慧及體力的考驗.

熱戀

什麼是青春? 甘怡身上便知道...因為她正與媽媽熱戀. 她除了痴纏, 吋步不離外, 還很喜歡錫媽媽的嘴. 她的嘴唇是會郁下郁下, 有時好似想咬爆我的嘴唇. 當媽媽的嘴接觸到甘怡沒有牙的牙肉時, 開頭感覺很肉酸, 現在已經習慣了, 每日最少錫10次, 有時錫鼻鼻, 面面, 間中錫小腿. 昨日由小腿錫到大腿, 好似都幾3級. 而我要強調, 是99%甘怡做主動, 而我也不知她從那裡學來的 (她由6個月大已經閞始懂得錫媽媽, 越來越激烈). 昨日, 在會所玩時, 甘怡也要求同媽媽錫錫, 被其他太太見到, 她說要威迫利誘下, 個仔才會錫媽媽. 令我想到個女唔知何時也會這樣...

近排, 個女學行, 常常觸住我的雙手扶住行, 我覺得佢好信任我, 我一步一步拖住佢, 感覺很高興, 事實也是拖住她成長, 很多謝甘怡給媽媽的這個機會, 令媽媽的母親節過得特別有意思.

八個月的甘怡

嘩, 原來成個月無寫BLOG, 甘怡又大咗成個月, 不過今個月的變化無上個月咁大, 始終由扶住企到自己識企係好難, 平衡係好困難.

甘怡近來食量大返D, 許多時食完都仲想食, 唔係佢嘅食飯時間佢都表現到想食, Nicole試吓餵佢又真係食得落, 我餵完佢食奶拎開佢個奶樽佢都即刻喊, 要再開多D 奶畀佢先得, 都好嘅, 早排佢病咗真係輕咗, 宜家肥返D 都幾可愛.

不過佢嘅可愛係得個樣同埋只係畀媽咪欣賞到, 佢對住我都係惡樣同埋唔多啋我, 今個月佢對媽咪嘅痴身程度又再升級, 就算媽咪係佢視線範圍, 但唔係掂住佢佢都會"發出喊聲", 注意, 佢唔係喊, 個KEYWORD係"喊聲", 然後就爬去痴實媽咪, 在媽咪的身上爬來爬去, Nicole話佢日頭無咁嚴重, 係我放工返到屋企佢先咁誇張, 佢估可能甘怡驚我搶咗佢阿媽, 又或者會阻住佢同媽咪"親熱".

我覺得我宜家係阿女心目中只係一個會開奶同餵奶的人, 食奶時佢可以好乖, 但一食完奶奶,佢就會反身掙扎逃離我的手臂, 再"發出喊聲"呼喚媽咪...唉...間中我都會有D 傷心, 但又無可奈何...

Nicole現在經常帶甘怡到會所玩, 在那兒識到一些太太和BB, BB的"月紀"同甘怡差不多, 常見的有三個男嬰, 甘怡和他們也有一點互動, Nicole也會和太太們交換心得, 明/暗地比較...甘怡算是最小的一個, 但可能是女仔的關係, 反而比較早識爬, 也爬得比人好, 但牙仔就仲未出, 比人遲, 不過暫時都算正常, 我們也不擔心.

嚟緊的日子希望, 甘怡獨立一點, 唔痴我也不緊要, 但不要太痴媽咪, 媽咪好忙好辛苦. 而且親友們都好想和她玩, 但她so far也比較內向, 我都希望可以她大個D時可以帶她到公園或不同地點影相和遊戲!

七個月大的甘怡的突變

甘怡滿咗七個月之後變化真係大!

之前佢只可以訓係床上, 識少少翻身, 多數都好似龜仔咁扒係床上, 我哋要照顧佢真係好容易, 餵奶、換片片都好簡單。

甘怡滿咗七個月後, 到宜家係七個月一星期加六天, 佢學識咗

1. 雙手支撑上半身;
2. 雙手令自己轉左轉右;
3. 向後爬;
4. 自己揸住水杯用吸管飲水水;
5. 訓係度的姿勢變成坐係度;
6. 坐係度變爬行的姿勢;
7. 向前爬;
8. 自己扶住D 嘢爬起身, 仲企到係度

呢8個階段好似係兩三星期裡完成哂, 每過幾天就學識一樣, 令我切身身感受到咩叫做:「細路仔大得好快!!」


唔知有無關係, 係佢學識呢D 動作呢段時間, 佢亦變得好扭計同好醒訓, 佢扭計得嚟又痴媽咪, 目光差不多100%時間也要望住媽咪, 媽咪行開幾秒佢就會開始扭, 再耐D 都唔出現佢就會喊, 我呢個做老豆嘅試過好多次想安撫佢, 抱佢, 分散佢D 注意力, 但都係無用, 只要媽咪出現返, 佢就會伸出雙手攬住, 媽咪企係度佢攬腳, 媽咪坐係度佢攬手或倚在媽咪的懷中, 坦白講我真係有D 呷醋, 甘怡仲好似好耐無對過我笑啦, 唉.

甘怡半夜又成日醒, 如果我可以係佢醒哂之前畀個奶咀佢安撫佢呢, 或者佢會訓返, 但如果安撫唔到或太遲, 佢會坐係床上, 面向牆, 然後發出D 扭計 "air air"聲, 再唔理佢呢, 佢就會喊, 越喊越大聲, 咁我就會攪佢唔掂, 要媽咪出馬! 佢咁樣樣真係幾煩, 我真係想過放佢出家門口由得佢喊, 又真係試過自己走出廳, 關上房門由得佢喊 (當然媽咪好快就會入房安撫個女啦), 攪到日日都無覺好訓, Nicole亦因而病咗, 我同甘怡都跟住病 (請睇我老婆寫的相關文章).

女呀, 你幾時訓返正常呀?!

題外話
因為病咗, 原本想探個朋友及她的初生BB快被迫取消了, 雖然Nicole仲係想去, 但我話: 「甘怡兩個月時我哋都怕人哋有病(當時H1N1好"hit")會傳染我哋甘怡, 我哋就無謂走去傳染人哋個BB啦。」結果復活節就無乜見人, 好悶咁過咗啦.

三個一起病, Yeah

記得上次老公咳到顛左是長達2個月時間, 但我同個女竟然是沒有事. 今次, 真的不得了, 一家三口齊齊病. 我相信是因為甘怡快出牙, 晚上睡得不好, 成日醒, 再加上老公的鼻寒, 試過1晚5次起床, 雖然我感覺好似好精神, 但卻又沒有真正睡過, 不停起床, 便感冒了. 甘怡咁痴我, 我笑佢就笑, 我病佢當然又有份. 而老公向來比我弱, 佢又要有份, 唯有一家3口, 齊齊病, 齊齊感冒. 最不著數便是放緊復活節假, 邊度也不用去, 悶到暈左, 日日食藥, 乖乖在家陪甘怡. 今早, 甘怡又睡不了, 到最後4:00我都醒哂, 唯有起床煮粥, 開電腦, 睇下個女, 睇下個老公, 兩隻死豬咁, 真幸福. 所以, 做人最緊要睡得好, 身體都好一些.

七個月

很久沒有寫事誌了, 生活可能重複但卻是繁忙. 個女一日一日長大, 由轉身到向後爬, 再坐, 又向前爬. 聲音由嬰兒到大大聲的叫, 生活的點滴卻是很回味, 真的多謝老公給我做全職媽媽的幸福.

甘怡已經懂得用飲筒飲水, 又喜歡拋球, 又會由爬的動作轉去坐, 對我來說, 她已經很叻了. 近日, 天氣回暖, 帶多了甘怡去會所的遊樂場玩, 她的表現非常好, 由自己玩, 到主動 "料" 其他小朋友玩, 也不怕人, 還會對著人地講 BB話, 摸人地的手及腳. 當我抱直她扮企時, 她很高興, 以為自己跟其他小朋友一樣, 見到人地跑, 她也會腳郁郁, 我相信她也是一個喜歡與小朋友相處的人. 家裡的一個唯一孩子, 最重要是有朋友, 多接觸其他小朋友, 便可有模仿對象. 但每次她玩到嘔奶時, 所有的朋友都會四散.

滿了六個月的甘怡

其實今天甘怡不知不覺間已經六個月兩星期又兩日大, 時間過得真係快, 由細細粒, 軟綿綿的一舊飯, 變成大大隻, 有性格又痴身的"公主".

甘怡越來越大力, 早排Nicole同佢去完街返屋企, Nicole放咗佢係床上後去厨房整嘢, 突然間聽到一聲巨响, 入房一睇, 見到甘怡張床成張床欄跌咗落地下, 甘怡一D 都唔驚仲係床上手舞足蹈, 又對住媽咪笑! Nicole嗰下又嬲又想笑, 嬲佢百厭到床都整爛, 笑佢個樣一D 都唔知驚, 我聽到佢電話講呢件事時都分唔清佢係喊定笑!

Nicole會帶甘怡去父母那兒的會所玩, 因為有個大D 嘅BB空間, 有好多玩具, 又可以畀甘怡見吓呢個世界上原來仲有好多BB架. 個會所最好係可以借D 玩具返屋企玩 $100/年咋! 咁阿女就有好多玩具可以玩, 我哋又唔洗買D 玩得一陣嘅玩具, 慳返好多錢!

甘怡的食量呢個月來都穩定, 一來佢無表現出唔夠, 二來佢身長已經"Above Average", 我哋就無再加上去, 開始畀糊仔, 蘋果蓉佢食, 都肯食嘅, 但就要花D 氣力先肯囉, 餵完仲一定要沖涼, 因為實在太汚糟, 成臉成身成地都都係食物, 所以佢個LUNCH係要成個半鐘(連沖涼).

至於訓覺就更麻煩, 以前放低佢係床一陣佢就識自己訓著, 宜家成日係張床到爬來爬去, 大喊, 見到阿媽先肯訓, 明知咁唔係一個好嘅訓覺習慣都無辦法, 唯有繼續"呵"住佢訓啦 (呢個工作係老婆做多).

嚟緊係花展, 期待緊影多D 全家福! :D

農曆新年中期感想

轉眼間農曆新年的假期又過哂啦, 農曆年又過了一半 (以初十五結束計), 今個虎年開始得不太順利, 大年初一就同老婆吵架, 但塞翁失馬, 後來無論關係同老婆的EQ又好像有些進步.

甘怡在農曆新年的表現非常好, 除了在團拜時好多表情, 之後和我的關係都親密了許多, 多咗同我笑同我玩, 她也多次在我的懷中睡著了, 看著她熟睡的樣子, 感覺到她對我的信任和親密.

每次我也抱得她緊緊的, 也會錫她的臉和小咀, 以前看到家姐姐夫會和他們的孩子們KISS我總覺得怪怪的, 因為KISS在我眼中只男女朋友之間的行為, 但現在我覺得是十分自然的親子行為, 許多時甘怡被我和她媽媽錫完之後都會笑, 感覺真的很幸福呢! :D

新年將近

過多1日, 呀女便過第一個新年. 上年這個時候, 我才剛剛知道我有左, 而今年便要帶呀女去拜年. 平日, 個女少見人, 多在家休息, 一出街, 人又多, 又吵, 呀女一定唔慣. 新年又有很多人想抱佢, 一抱行開了又見不到媽媽, 又會喊, 一個弱小的嬰兒好似沒有選擇下, 去乎合所有人(約2三十人)的意願, 呀女一定唔好受. 做人呀媽真係要保護個女, 費時佢大年初一大喊特喊. 我只希望甘怡的第一年新年過得快快樂樂, 健健康康.

五個月

甘怡已經五個月大了, 身體重咗好多, 手腳的力量大很多, 活動能力亦多咗.

佢亦開始識得轉身,甚至乎係鍾意咗轉身, 有一次佢著衫厚咗, 轉極都轉唔到, 但不斷咁試, 試咗十一次佢終於轉到, 希望佢將來做事都係咁有恒心就好啦.

甘怡另一樣值得講嘅就係佢十分扭計同親媽咪, 成日都喊得好利害,  就算身為父親的我, 都好難能令佢笑, 我宜家已經降低要求, 只求佢唔好見到我喊就已經好開心啦. 老婆同朋友安慰我, 甘怡開始認人, 自自然然會親近照顧佢嘅媽咪, 佢就算喊得好勁, 媽媽一抱佢就會靜返落嚟, 成功率都有九成! 當然, 媽媽都唔係百份百成功嘅, 有時甘怡真係喊到"阿媽都唔認得"! (合埋眼喊又點會認到阿媽?:D )

轉身的意外

總有第一次, 但又總很怕發生的家居意外! 呀女本來懂得轉身是多麼快樂的事情, 昨天懂得轉身, 今天懂得連續轉身, 但卻出乎了媽媽意料, 結果, 由媽媽床掉了在地. 雖然, 只是哭了兩聲便沒有事, 但媽媽心裡卻不是味兒, 更多了一些擔憂及自責, 家居意外真是防不勝防. 呀女越來越大, 睡下午覺的時間也越來越短, 而要媽媽的時間也越來越長, 不但痴身, 而是好痴纏, 她的眼睛不停望住媽媽, 看不見媽媽便哭. 看見媽媽笑, 她便笑, 學習人的表情, 也學懂媽媽的說話, 反應也越來越快. 相信當呀女懂得步行時, 便是媽媽減肥的日子了.

話咁快就一年

話咁快就一年, 我講緊嘅係呢個blog開咗一年, 即係一年前剛知道我哋會級做父母。

「時間過得真係快」呢句嘢老土但我真係忍唔住都會講, 呢一年嘅心情的上上落落真係多, 有D 時刻好開心, 又有D 時刻好感動, 亦有D 時刻好嬲, 不過, 我依然相信生BB係一件好事嚟嘅, 咁先係真正長大, 真正"成家立室", 人生先算係咩都做過啦。

不過, 嚟緊仲有好多年, 有時諗起都會有D 擔心將來, 始終女兒的人生做父母的責任好大, 自己暫時都未有信心可以教好個女, 又驚佢惡死唔聽教, 更驚佢跟埋D 壞同學變壞, 「養兒一百歲, 長憂九十九」真係至理名言。

叻!我至叻!

叻!我至叻! 個個都認為自己個女係最叻! 我發現我個女至叻係自己會瞓覺. 我不流都以為係理所當然, 眼瞓便自然會瞓, 而身邊的朋友都話佢好乖, 好叻, 當她們分享完她們的經驗後, 我才發覺甘怡好乖. 每晚食完最後一餐奶便自己乖乖瞓, 唔會嘈.

甘怡近日已經懂得摟抱, 又食手指, 左手捉右手, 但有時佢自己太大力, 又會叫, 見到她真好笑. 甘怡好鐘意人地讚同拍照, 有時唔食奶又會講好多野, 常常投訴, 好有自主權. 現在已經開始學習食糊仔, 食到好好笑, 又流口水, 成隻大閘蟹咁, 不知幾多泡, 甘怡真的又長大了.