甘怡廿三個月

明天甘怡就廿三個月大

先講智慧, 最近佢講多好多嘢, 開始唔洗估估吓, 佢識得用口要求食菜, 落地, 去沙灘, 睇書又識得講返書入面有咩嘢, 例如: 動物, 爸爸, 媽媽, 仲識得話自己"識讀", 但其實係唔識! 昨晚上床前同佢玩扮動物, 佢全部都扮到; 祖母送咗部iPad2畀我哋, 我裝咗D 字母app畀佢玩, 佢都認到大部份字母, Nicole平日亦開始教佢認中英文字, 甘怡似乎都分到中英文, 不過要再觀察一下.

另外體能方面去識得雙手掂地撑住上身, 雙腳放係梳化度, 又識得爬一個鐵繩網, 游水又能夠向前游好遠.

起居方面呢, 呢個月Nicole開始同佢戒片, 問佢想尿尿要去邊呀, 佢會大大聲講"廁所!", 不過....佢次次都係無聲無色咁賴咗, 昨天高峰日頭賴咗三次尿一次屎, 執到Nicole死死吓, Nicole同我講返, 我又問佢有無尿尿, 佢話"無", 轉個頭佢又賴咗啦, 激死人!

賣咗張BB床之後, 安裝好佢表姐讓出嚟嘅"兒童床", 甘怡都肯訓, 雖則訓著之前都係要係我哋張床上攬實阿媽, 但至少無半夜爬上嚟, 可能佢都訓得幾"琳"呱.

自從上次個BLOG以來, 我都無再發甘怡脾氣啦, 加上佢都真係幾聽話; 佢仲成日古靈精怪, 識得故意激我哋, 所以呢排十分ENJOY同佢玩。