"靜"

今日同阿女去XMAS PARTY, 當佢食緊蛋糕時, 我係旁邊試探佢...
我: 咦, 個蛋糕好唔好味?
女: 好味
我: 丫, 唔知爸爸有無得食呢?
女: (無出聲,繼續食...)
我: 爸爸都好想食喎, 唔知點先有得食呢? (我估佢叫我自己拎一件)
女: (無出聲,繼續食...)
我: (忍唔住直接問) 唔知阿女會唔會請爸爸食呢?
女: (吞咗啖蛋糕後) 你靜咗先有得食....
我: (合埋個口)
女: (手上有大啖蛋糕) 下一啖先啦
我: (等)
女: (分一小啖) 畀你啦...

甘怡的朋友

今日同甘怡去公園玩, 有一個姐姐同佢一齊玩, 玩得很開心, 近幾個月, 我覺得甘怡大個咗, 識得同同學/其他小朋友玩。
回家路上, 我問甘怡玩得開唔開心呀, 佢話: 開心
我又問: 鍾唔鍾意同姐姐玩呀?
佢話: 鍾意, 我係學校都無人同我玩o既。
我話: 點會呀?
甘怡: 我搵D 同學玩佢哋都話唔玩o既。
我再問"我以為係佢朋友的同學", 佢話佢同另一個女同學玩.
死啦, 無理由架, 返學好多人大叫佢個名架喎, 甘怡D 人緣唔似咁差唧,
AN2 d 活動我見佢都有同小朋友一齊玩架喎.... 到底發生咩事?

牙尖咀利2

今晚同公公食飯, 甘怡同媽媽坐, 我坐媽媽隔籬,
佢話: 可以同媽媽坐, 唔洗同爸爸坐.
我問: 點解鍾意同媽媽坐呀?
佢話: 因為媽媽好囉
我問: 咁點解唔同爸爸坐呀?
佢答: 我宜家食飯啦(拎起筷子)....

牙尖咀利

甘怡已經到咗一個牙尖咀利的年紀. 例子如下:

1. 媽媽話佢唔聽話, 話:"媽咪生個乖D o既BB, 唔照顧甘怡啦", 過咗一分鐘, 甘怡話:"或者生個仲唔聽話呢"

2. 甘怡咀唇爆拆, 爸爸話:等陣同你'查'唇膏啦, 點知佢話:"仲'查'唇膏, 飲水啦直頭."
    我問佢係邊度學返嚟, 佢好正經咁講:"或者我聽過你哋講, 所以咪學識咗囉."

3. 同甘怡食薯條, 我問佢食幾多條, 佢話:"我食完之後話你知啦."

升降機

今日甘怡去完踩單車, 返家時遇到D 鄰居, 媽媽同人傾住偈就入咗LIFT, 甘怡因為坐係架車度, 就轉唔切車頭, 突然有個地產經紀帶住個客入哂架LIFT, 咁我就同老婆講: "我同甘怡搭另一架啦" (因為另一架都到了), 鄰居都問洗唔洗車返LIFT, 老婆都覺得唔洗啦.......

原來甘怡唔係咁諗! 係我講完:"我同甘怡搭另一架啦", 老婆架LIFT 就關咗門, 甘怡即刻大喊, 係架單車上發咗癲, 對住度LIFT門係咁喊:"媽媽,媽媽", 我話:"媽媽返咗屋企咋, 唔洗驚,我哋搭另一架LIFT返屋企咪見到囉!" 因為第二架LIFT都有人入咗, 所以我叫人上去先.

甘怡指住第一部LIFT度門,話:"我要媽媽我要媽媽,好掛住媽媽" 似乎佢要媽媽係返嗰度門出返嚟先安落, 第三部LIFT又到咗, 我又叫佢搭啦, 有個姨姨都嚟安慰佢, 快D 返屋企啦, 我想抱起阿女, 佢唔肯, 係度等媽媽再出現.

我再試下攬住佢, 佢終於肯畀我抱, 我話: 我哋搭LIFT上去搵媽媽啦, 佢係屋企之嘛, 佢一路喊住, 我就單手推兩架單車入LIFT, 好彩姨姨幫手按住部LIFT, 先上到樓.

上到樓, 一出LIFT我就叫佢自已返屋企啦, 媽媽見我哋咁耐未上嚟 (攪咗五分鐘), 都開住門等, 佢即刻攬住媽媽喊, 媽媽就氹返甘怡, 甘怡先止喊為笑..

第一次畫爸爸

今日收工, 甘怡忽然話要畫爸爸! 我心諗, 前日你畫隻"兔仔"好似畫咗隻蛋出嚟咁, 你點畫"爸爸"呀, 點知佢真係畫到喎(至少係一個人的臉, 至少我睇得明佢畫乜)

初頭佢無畫頭髮, 佢話係畫"BB時的爸爸", 後來佢又話要畫鬚, 就畫到咁樣啦. :)
佢話係送畀我生日, 好開心也感動. :)

單車 (與海難)

將軍澳的單車徑原來已經開通咗, 放假就帶甘怡去踏單車, 風景優美, 好似以前吐露港咁, 不過當然短D, 但就腳好多! 跟住我同老婆就決定買返架大人單車, 等我哋可以陪個女.
第二天, 甘怡又話想去, 我兩父女就一齊再去,沿路慢慢的踩,睇住佢的小腳一下一下努力的踩著,有一種幸福的感覺;看到她一天一天長大,,也有一種成功感.

由屋企踩到2/3距離,去到一條下斜的路,之前我教過她剎制,她也用過去多次,所以雖然條斜路比較長,我都係放心咁叫佢跟住我慢慢溜落去,點知佢失手,從後面撞上來,佢叫哂爸爸,我向後望已她已差不多撞到來,我只好伸手保護她的頭,車速其實不快,她最後也沒有撞到頭,但不知何故流起鼻血來,嚇得我!

甘怡比我更驚啦, 我即刻安慰佢:「無事啦」, 甘怡無喊, 但似乎係嚇親, 我就話:「你流鼻血呀,爸爸幫你抺返佢」又問佢有無撞到頭, 有無擦損手,佢都一一答無, 咁又真係無流血, 有路人幫我們搬單車上行人路, 我幫佢止血, 就叫佢慢慢行落斜路, 我就推車, 去到平地, 搵地方坐, 食下嘢, 飲吓嘢, 佢就回復正常了, 忘了剛才的驚慌了. :)

事後同老婆講返, 佢今次出奇地冷靜,仲以為佢會鬧我唔睇住個女添. (女人真難觸摸)

-----------
原本只想寫單車,但後來香港發生海難,大家都感慨人生無常,我都諗,明天如果我唔係度,我希望呢個BLOG令女兒會知道至少爸爸和她一起過了一個很開心的假期, 希望這些日子可以長長久久!

點滴

很久沒寫, OT太多..記得這些事情...事情按感動程度..

1. 「想爸爸係公司做哂D 嘢..」
近三星期, 因為趕PROJECT, 好多晚都夜返屋企, 早返都係見吓甘怡但又要再開工, 星期六日都留係屋企做嘢, 結果甘怡今晚就講了一句這樣的說話。聽了我的反應時大笑, 但其實心中有瘣, 因為留家工作的那個星期六, 她一臉開心的走向我, 同我講:「爸爸, 我想去沙灘呀‧」 但我不好意思的答她:「唔得呀, 爸爸要做嘢呀, 唔可以去咁遠玩呀.」跟住她極速變得十分失落同喊起嚟, 扭計說要去沙灘, 幸得媽媽解圍, 改說玩去別的地方, 她才再露笑臉.

2. 「媽媽點解揀爸爸?」
唔知點解睇動物記錄片佢會諗起呢個問題, 媽媽當然答覺得爸爸好之類, 又說:「你大個都會搵到個老公同佢生BB架‧」冷不防甘怡再問:「咁如果搵唔到呢?」媽媽想了想答:「媽媽會陪你生活, 一樣咁開心, 係唔係?」甘怡就笑了。
(不要問我答解揀媽媽)

3. 「水係咩做架？」
呢樣覺得值得寫係因為佢真係好有好奇心, 跟住佢仲問氫氣同氧氣係邊度嚟, 我話係海水同空氣嚟...其實...佢再問就要講宇宙大爆炸或者聖經架啦.. :)
好多嘢佢都問點解同係邊度嚟.

4. 四個位置三張椅子 - 搬椅子的LOGIC
家中有四個位置, 可以放甘怡用的椅子
1. 門口 - 畀佢著鞋(矮有背椅)
2. 客廁 - 畀佢洗手(BB廁所兼椅子)
3. 主廁 - 畀佢刷牙(矮無背椅)
4, 書枱 - 畀佢同媽媽做手工/畫畫
原本是2,3,4, 後來甘怡自己想著鞋有得坐, 我哋就搬咗4去1.變成1,2,3.
今天, 媽媽想書枱有返張椅, 方便做手工畫畫, 就話, 不如將客廁張椅(2)搬去媽媽房個廁所, 入面嗰張(3)再搬去門口, 門口嗰張(1)再搬去書枱(4)啦.
甘怡想了一想(媽媽說看得出她在想)說: "但我鍾意係客廁洗手喎....." 媽媽說很suprise甘怡咁都攪得清楚個情況, 知道最後會點...
結果椅子位置都係不變.

三歳

唔通三歳真係咁大分別？甘怡晚上突然肯自動訓返自己床又自己刷牙。

乜都扭一餐

昨天原本Nicole應承咗同甘怡一齊沖涼，
到咗時間，甘怡扭計唔肯沖
Nicole唔理佢自己沖先
到Nicole出嚟，甘怡唔畀Nicole著衫，著咗底底都要媽媽除返，
然後再陪佢沖過....

Nicole當然唔肯啦，捉佢入浴缸除衫，開水沖。
但甘怡仲要拉媽媽件衫，結果快快沖完佢，咪又係無嘢。

有勇氣的甘怡

過去，阿女上堂都好被動，有時更要老師特別照顧(如攬住), 也從不會舉手，除非有禮物想要。

昨天上美術班，佢第一次自己用紙碟等材料，做了一個爸爸的臉。

後來老師叫同學講下自己造了什麽。甘怡舉手，老師見她第一次舉手，就讓她講。她說這是眼，那是耳，星星是咀。

甘怡肯踏出第一步了!

終於第一次甘怡係我手上停止咗喊

昨晚堅持咗一輪，終於第一次甘怡係我手上停止咗喊。

佢早訓，後來醒咗，我哋叫佢去刷牙，佢扭喊同推開我，我抱咗佢係廁所，大家困係廁所唔畀佢出去，要佢刷埋牙先准走。

佢一味喊，話好驚，我問佢驚咩，佢話驚我，我一味話爸爸無惡無打無鬧你，唔洗驚冷靜D。

佢話好想訓覺，我話你刷完即刻可以訓囉，一味重複咁講。
咁struggle咗一輪佢終於冷靜落嚟，肯畀我刷牙，然後跑上床訓覺。

QR

發咗癲

甘怡今日發咗癲, 去完街返到屋企, 竟然唔肯除鞋, 媽媽堅持要佢自己除, 唔理佢, 佢喊咗卅分鐘都唔停. 媽媽用咗不同方法叫佢自己除, 佢都唔肯, 喊得好大聲.

後來我出手除佢對鞋,拎咗佢對襪去洗,  佢反抗, 喊得再勁D, 之後仲要拎對新襪嚟著, 又著返鞋,繼續要阿媽幫佢除鞋.

如是者前後45分鐘, 媽媽抱佢入房, 安撫佢情緒, 之後話要罰佢坐無影"鄧", 佢又喊, 又要阿媽抱, 媽媽拖住佢手但要佢自己坐低罰, 佢先慢慢靜落嚟, 肯聽媽媽教訓.

古古惑惑

今天同甘怡游水, 後來佢唔願走, 勁扭計, 後來話去食紅豆冰, 佢態度先軟化, 我話: 你頭先唔聽媽媽話要道歉咗先有得飲紅豆冰! 甘怡即刻死死地氣講Sorry.

她食油脾架紅豆冰, 紅豆冰飲咗大半, 我就同佢講, 你飲咗好多啦, stop啦,隔咗幾秒, 佢即刻好慘咁話:"雞脾好咸呀"....(暗示要飲紅豆冰).

臨訓佢係咁抓癢, 我哋幫佢搽咗D 藥, 我哋認為都夠, 但佢都繼續扭計, 我哋話唔可以搽太多架, 佢隔咗一陣話:"我宜家抓癢架啦".....擺明示威! 見佢咁痕又再搽多少少. 唉, 又輸了.

錫與縱的邊緣

甘怡每天對住媽媽, 媽媽好多時都會縱佢, 會餵佢食飯, 會幫佢換衫,甘怡一扭計媽媽就會心軟.
作為爸爸, 好多時都睇唔順眼, 尤其近年咁多人講"怪獸家長", 更加覺得老婆太縱甘怡啦.

放工後老婆都會畀機會我去照顧甘怡, 和甘怡玩, 但我同老婆對甘怡的方式實在唔同, 甘怡只會係玩的時候和我親近, 一到正經嘢 (食飯, 梳洗, 睡覺), 佢都會話:唔要爸爸過嚟/驚爸爸/唔識乜乜(=要佢做的事情).開頭聽到佢話"唔要爸爸"的說話,我都會十分火滾. 老婆又話我失敗, 連個女都怕咗我.

經過一輪觀察, 漸漸發覺"唔要爸爸過嚟/驚爸爸"都係甘怡扭計唔做嘢的方法, 因為甘怡和我玩的時候係好開心, 一話"刷牙"佢就會變臉話驚爸爸!

同老婆討論咗一段日子, 老婆似乎都明白問題不在我度, 尤其甘怡都會用"唔識乜乜/驚乜乜"嚟對佢自己的時候, 老婆開始都會唔畀甘怡扭計, 開始教甘怡唔可以咁樣樣.

甘怡流鼻血

昨晚甘怡流鼻血, 其實係第二次, 不過我遇到的就是第一次.

她的樣子好像有D 驚, 因為都流幾多吓, 佢都唔咁再動, 老婆叫佢用口呼吸, 我就幫佢按實鼻子, 我問佢係有驚呀, 佢點點頭, 好可憐的樣子, 我就同佢講話無事架, 唔洗驚, 爸爸都試過流鼻血, 都係因為掘鼻囉, 過一陣就無事架啦. 老婆就不斷話佢:早就叫你唔好掘鼻架啦, 宜家流鼻血啦.

過咗一陣, 鼻血停咗, 突然一個"乞次", 成條鼻血走出嚟, 佢實都有D恐怖, 到真係停哂之後,
我就抱佢去廁所清潔, 叫佢快D 訓, 明天再檢查下就應該無嘢啦.

這一刻, 特別感受到女兒對自己的信任. 平時的無禮都一筆鈎消啦!

個女忽然好大個

今朝同個女返學，我拎咗份報紙。
女：呢D 會所都有得睇啦。
我：爸爸好耐無去會所啦。
女：媽媽去會所睇雜誌。
我：爸爸都鍾意去會所睇雜誌。
女：咁你放假我陪你去啦。

好普通的一段對話，但覺得個女忽然好大個。

Trouble 2

甘怡呢兩個星期好扭計, 返學、睡覺、放學後, 都試過大喊唔聽我們的話.
有一次一路"典"地喊, 一路賴尿,攪到成地濕哂. 有一朝又話唔識/唔敢擦牙,又話要等埋媽媽陪(我企係廁所門口叫佢自己擦), 前一晚佢又扭計唔訓覺, 十一點都仲話要睇書, 結果我忍唔住大發脾氣, 怒打佢PETPET, 又捉實佢迫佢著衫, 佢想拖實攬實媽媽都被我阻止咗, 我嬲到甚至係甘怡面前近距離怒吼佢:"你係咪唔聽話".

唉, 做咗兩三個月慈父, 但甘怡扭計係嚟, 我都係忍唔住要發出嚟

被人捉咗？

媽媽：你睇吓嗰個生果 （指住隔籬檔口）
甘怡（企係地下，諗咗一輪都唔望）跟住話：我過去望會被人捉咗架喎
媽媽：叫你係度用眼望咋，點會被人捉咗去？

"食"字

餐廳有個大"食"字
Nicole: 係叫小朋友乖乖食嘢
KY:係不准食嗰食呀

數口精

今天媽媽打算煮六隻蝦，媽媽同甘怡講，甘怡兩隻，媽媽兩隻，爸爸兩隻，甘怡話想食三隻，媽媽話唔得，媽媽肚餓要食兩隻，佢話甘怡三隻，爸爸咪一隻囉。

小朋友真攪笑

故事1
爺爺係餐廳用隻紙粘土造的蟹問甘怡:"蟹係打橫定打直走架?" (一邊係枱上示範)
甘怡好快就答佢:"蟹係水度行架BOR.........."

故事2
甘怡睇中咗一個蛋糕, 口中經常提起, 每次經過那間餅店佢都會去望吓, 次次佢都見到同埋話要做生日蛋糕, 我哋應承咗佢今年生日買嗰個蛋糕畀佢
 今朝行過, 佢又入去睇, 指畀我睇吓, 到下午撞到爺爺, 佢又帶爺爺去睇,點知個蛋糕竟然唔係度(當然係被人買咗), 佢開頭都無乜嘢, 仲笑笑口話:"無咗嘅?" 我哋話:"係喎, 明天又有返架啦." 但離開餅店, 佢就開始喊:"無咗個蛋糕呀! 無咗個蛋糕呀! 我要個蛋糕!" 要媽媽安撫一輪先收聲.

賣花讚花香

作為甘怡的老豆, 有D 嘢我都想讚下個女.

佢係好有好奇心, 佢都算好多嘢問, 睇電視, 出街, 佢見到乜都問乜, 除了問東西的名稱, 我最LIKE佢係會成日問"點解?" 叫佢做D 嘢, 著咩衫, 佢都會問點解. 見到人坐輪椅又會問點解會咁. 有時又會睇到D 唔起眼的東西, 然後問係咩嚟.

細心, 正如上一篇所講, 佢出門口前竟然會諗定拎幾多架車仔.

聽話, 同小朋友玩, 佢唔會去搶人嘢, 別人搶佢嘢佢都識的保護自己的玩具, 到大人叫佢讓, 佢多數都會肯讓出嚟. (當然是聽媽媽的教導).

好記性, (尤其對去過的地方), 最好笑係佢係個商場見到個好靚的蛋糕, 媽媽話會買畀佢做生日蛋糕, 佢就成日講住個商場, 個地鐵站同埋個蛋糕, 仲會話我八月生日就可以食.

可能成長了, 宜家無咁怕人, 不過有時以為佢會唔驚/怕醜時, 佢又忽然會叫媽媽陪, 如果這個也改變了就好, 因為她要面對的陌生人會越來越多.

三架車仔

甘怡出門前執背包, 打算令車仔出街玩, 問: 今日有幾多小朋友?
母答: 有表姐, 表哥 同甘怡三個小朋友
過咗一陣, 甘怡: 我執好個背包啦, 帶咗三個車仔
母: 三架咁多呀?
甘怡: 因為有三個小朋友嘛

『由一到無窮大』

Kam Kuiting 這 是個『由一到無窮大』的故事: 拍皮球是幼高同學的比賽項目. 負責老師叫道: ‘‘誰準備好了, 就可以開始, 我給計時.’’ 甘怡捧著皮球, 瞪著老師, 看樣子是想向老師打招呼. 我準備好了. 但是老師只叫大同學運動, 對甘怡根本視而不見. 甘怡不管了, 同學拍, 她也跟著拍. 人家每次拍幾十下, 她每次只能拍一下, 不過不要緊, 她（似乎）知道, 拍球的下數, 在一定時間內, 是可以累積的. 跌球的次數是無限制的. 時間的長度大概是到上課鐘响吧.這才不厭其煩地, 一下一下地拍, 沒有人給她計數, 她就自己計數!
這很好笑, 也很有趣, 是不是? 我喜歡她的「自以為是」.

過了四天假期, 我自問同個女的關係突飛猛進

一連四天的復活節假期, 估不到有意外的收獲, 就是女兒和我的關係好像好了許多.

這幾天和女兒其實並沒有安排什麽驚天動地的活動,

第一天 ,去MegaBox, 有朋友帶女兒到訪, 第二天去了中央圖書館,赤柱,入咗香港仔食飯, 第三天和我父母飲茶, 又和他們入了科大, 第四天只係行吓商場, 別人的生日會, 又有朋友到訪

可能老婆病咗,我多咗照顧女兒的時間, 女兒都會叫我陪她玩, 又發明咗"收集叻叻"同"八達通"呢兩個遊戲. 甘怡成日都會撩我玩.

"收集叻叻"係有一次佢自動自覺去咗V V, 我讚佢"叻叻"時, 畀咗隻母指佢, 叫佢"袋好呀", 佢就扮拎咗我個"叻", 放入衫袋度. 呢幾日佢一做咗D 好嘢, 聽話, 我都會畀一至三個"叻"佢, 仲話可以換禮物, 例如雪糕,..問佢想要咩禮物, 佢竟然話要"銀包"... :P

"八達通"呢, 就係平時返學畀佢用我或爺爺的八達通入閘, 放假時, 畀咗張Disney閃咭佢話係"扮八達通", 於是佢就成話要"畀錢", 要用"八達通", 連係屋企內跑步, 佢都話要"入場費", 要DO八達通,佢鍾意呢個遊戲鍾意到有次我買嘢畀張真八達通佢, 佢都話"唔要真, 我要假八達通"! 笑死人!

玩吓玩吓呢兩個遊戲, 我覺得甘怡望我的"眼神"係有D 唔同咗, 也許係我好主觀的感覺, 覺得她的眼神係帶點"笑", 係有個"對住爸爸就係開心"的態度, 而不是"爸爸和我玩得好開心"的"反應". 甘怡今晚還肯讓我陪她在新床"肉"在廳睡 (因為避開Nicole病). 有史以來第一次呢.

今天我真的感覺到做爸爸最開心的一面, 希望這些日子, 這種感覺可以繼續下去.

媽媽病了點算好?

甘怡媽媽病了,一早上床訓覺,到甘怡差不多時候訓覺,甘怡慣性要攬住媽媽訓, 吵醒了媽媽.
爸爸叫甘怡出廳,說:"你知道媽媽病了嗎?"
怡:"知道"
爸:"你想唔想媽媽好返?"
怡:"想"

爸:"媽媽病了最想做乜呀?"
怡:"訓覺"
爸:"咁媽媽訓唔到個病唔會好返喎" 怡:"...."
爸:"咁點樣媽媽先訓到覺呀?"怡:"安靜"
爸:"咁你頭先一入房就嘈醒媽媽,媽媽點訓呢?"
怡:"..."
爸:"咁你入房之後安靜好唔好?"
怡:"好"


再入房一次佢即刻想走去攬媽媽...爸爸再阻止佢...佢扁哂咀但無出聲...爸爸再拖甘怡出廳.

爸:"你又話會安靜嘅?"
怡:"..."
爸:"我知你想攬媽媽,但今晚自己一個訓得唔得?"
怡:"好"

佢再入房,我手指指叫佢訓覺,甘怡:"我唔想訓"
爸:"你唔訓你可唔可以唔出聲?"
怡:"可以"

爸爸去咗沖涼, 以為甘怡會訓著, 點知沖完涼發覺甘怡未訓, 不過真係好安靜, 係黑暗的睡房內坐咗係自己床度.
一小時後再CHECK佢,佢都係上咗媽媽床,但在媽媽半尺之外訓著咗..

小事三宗

1. 六碟餅
昨天甘怡好乖,識得自己去廁所,第一次開大,媽媽就將獎佢食一碟餅.
第二次佢又識自己去vv 喎,媽媽又再獎兩碟.v v 完後甘怡即刻走去飲水,想快d 再有v v!
媽媽問第三次獎幾多餅呀? 甘怡話三碟餅.
咁四次呢? 甘怡竟然話六碟! 為咗食甘怡真係咩都做得出.

2. 復活節的花
媽媽買了花,放係甘怡枱面,過咗一陣,問甘怡可唔可以送d 花畀媽媽,甘怡話:"好! 復活節送畀你丫!"
飲飲今日先至係三月廿二日咋喎.

3. 好記性同講條件
甘怡好清楚自己只係小朋友,我哋成日話呢樣唔食得,嗰樣唔做得,咩嘢係小朋友要自己做.
通常我哋都會話大個就得,有時話三歲,有時話六歲,到下次相同情況再出現呢,佢就話:"阿女大個先可以做/食. N 歲啦" 多數都講得啱個條件架喎.
於是乎我就會同佢講條件,想A 呢,就要先B, 除了眼訓,九成時間甘怡都聽話.

貪玩的甘怡

昨天甘怡學校補假,我們一家去了廸士尼,甘怡好開心我重同佢第一次玩"轉轉杯",佢叻過佢阿媽而且一d 都驚唔驚,轉得越快佢越開心.
玩耍到六點,同佢坐小火車時佢開始無電,但落車時佢見到"小飛象",當時我抱住佢,佢好細聲講:"我要玩小飛象.",我話:"咁你坐bb 車等啦",但一放落車佢就已經訓著咗!

佢到八點幾先醒返食飯.

夜晚十點半,叫佢訓覺,佢又話"好精神,唔想訓"
咁媽媽問佢想做乜,佢話:"我想去街!" 女呀,你大個會唔會變咗夜青架?

佢扭計咗一輪都唔訓,我叫佢唔訓就出廳,唔好阻住阿媽訓,佢以為有得玩,點知一行出廳就畀我捉咗佢去naughty chair,佢三秒後就知驚叫阿媽救佢,阿媽咁攰當然無理佢.

過咗五分鐘,我示意罰完,抱抱佢,同佢講:"你宜家唔訓覺畀爸爸罰,第二朝遲起身又畀爸爸鬧,要鬧兩次,係唔係?"
佢好似明咁話:"知道"
我再話:"你不如宜家攬住媽媽訓覺,明天準時起身,咁爸爸媽媽就讚你乖兩次,好唔好?"
佢又細細聲講:"好"
總終於佢都好合作咁上床訓覺.

甘怡金句三

1. 媽媽一陣去廸士尼唔准訓覺呀
2. 媽媽點解話飽又拎嘢食嘅?
3. 阿女話飽，一陣就變咗，就肚餓。
4. 晚上十點半, "媽媽, 我唔想訓覺", 媽:"咁你想做乜呀?", 甘怡:"我想出街"

當甘怡遇到大人.

甘怡今晚食飯自己睇字咭,事後媽媽同佢Pillow talk,媽媽問佢點解唔同人傾偈呀"係咪驚呀?"
甘怡:"係呀"
媽媽:"係咪唔認得呀?"
甘怡:"係呀, 爺爺帶返學."
媽媽:"係呀,其他人係親戚,耐唔耐先見一齊,所以唔認得囉, 但爸爸媽媽一齊食飯o既人,唔洗驚架."

搬屋

甘怡見到同一層有人搬屋, 問媽媽人哋做緊乜, 媽媽答佢:人哋搬屋呀.
甘怡:點解搬呀?
媽媽:或者人哋唔鍾意呢度呢.
甘怡:我又要搬屋
媽媽:搬去邊呀?
甘怡:搬去藍田靈糧幼稚園.

(真係要讚吓D 老師喇)

BTW, 佢仲識自己起樓(積木）...起咗五層...地下畀媽媽，三樓畀爸爸，五樓畀爺爺..

甘句三

1. 幫爸爸找老婆?

今日去玩具圖書館玩玩下,甘怡忽然爆一句::爸爸,我幫你搵過個老婆丫....我問佢你講多一次? 佢好似知講錯嘢, 只識笑笑口,拎歪面...真係畀佢激死.

2. 去旅行要去日本?
媽媽話今年或者同甘怡去台灣旅行, 甘怡話:不如去日本啦...媽媽問點解,甘怡話:"日本有奶奶睇"..

咩嚟架?

心水清

我換完床單放咗甘怡個pillow上我張床, 佢係房後問媽媽媽:"點解個pillow上咗去架, 佢無力自己上架喎?"

甘怡唔要媽?

呢兩日甘怡放學都好扭計,昨天媽媽叫佢陪落會所,佢死都唔肯,媽媽好嬲,問佢係咪唔聽話,佢話係,問佢要唔要媽媽,佢又話係,攪到媽媽好傷心,仲嬲到開門趕甘怡出門口! 呢樣嘢我都唔敢做,平時我都係我鬧甘怡多,都話過甘怡一次:出門口,估唔到佢今次咁嬲.

甘句

呢排甘怡講嘢老績咗,同爸爸講電話第一句係問:你今日開唔開心呀.
又會問媽媽:你細個頑皮嗎?

媽媽話佢唔聽話,問佢罰打patpat好唔好,佢話:好.....細細力.

成日都話驚爸爸惡,我問佢點解爸爸會惡,佢又識得答甘怡唔聽話,咁我咪話你聽話爸爸咪唔惡囉!

甘句二

1.
媽媽叫甘怡做事, 完成後, 甘怡話:"講唔該丫"
媽媽:"唔該"
甘怡:"唔該甘怡丫"
媽媽:"唔該甘怡!"
甘怡:"大聲D 丫!" (我哋成日叫甘怡叫人/唔該 要大聲...估唔到佢學到足...)
媽媽只好唯命是從.

2.
晚上甘怡唔肯訓, 想跳繩, 媽媽問:"跳幾多下?"
甘怡:"六下丫"
媽媽:"咁你跳啦..."
甘怡:"媽媽唔好數喎..." (扭計聲...)

3. (爺爺在Facebook寫的)

我勸甘怡不要把一整塊梳打餅干塞進嘴里, 她便一小口一小口的吃了.
「這是月亮」, 我指著她吃了第一口的餅干說.
她再咬了一下,「dog」, 她拿著一塊餅碎說. 它像『D』.
她細細的把『D』吃了幾口, 笑著說: 「shoe」. 我仔細的看, 是小靴子.

"我好痛...."

甘怡: "媽媽嚟同我玩啦..."
媽媽: "媽媽要做家務呀...你自己玩啦..."
甘怡: "媽媽唔同我玩, 呢度痛呀..."
媽媽: "呢度係邊度呀?"
甘怡: "個心痛呀"
(唔知邊度學返嚟...)

你最錫誰?

搭地鐵時, 媽媽問甘怡:媽媽最錫邊個呀?
甘怡答:甘怡
媽媽: 爸爸最錫邊個呀?
甘怡: 甘怡
媽媽: 咁甘怡最錫邊個呀?
甘怡(望一望爸爸)答: 媽媽....(隔咗三四秒) 同埋爸爸

將教養送給孩子

小點滴

一.
周末早上八點幾, 爸: "不如你上返床陪媽媽訓多陣啦?"
女: "唔訓啦, 起身啦, 都成十點囉!"

二.
媽媽和女比賽抛豆袋, 平時媽媽會讓女兒, 今次試下一次都不讓, 甘怡連輸三次, 結果就大喊, 後來媽媽又讓佢, 佢就認叻: "阿女贏!"

三.
甘怡要攬住媽媽訓, 爸爸問佢攬幾耐先肯訓自己張床, 佢答:"攬到聽朝呀..." 我話爸爸要同媽媽訓喎, 佢話"阿女同爸爸都係老公,同媽媽訓"... O 哂咀.....

甘怡二十八個月

十二月是一個聚會的月份,分別約了不同的親友,也參與了一個BB的Christmas party,希望女兒多接觸人,比起一年前,甘怡真長大許多了，雖然不算很social,但見到人也不會再躲在我身後,教她叫人她也會跟著叫,別人和她說話,她明白的話她會答,不明白的話她會用眼神向父母求救;握手，抱抱，飛吻等動作和大部份人都可以做，連二叔錫她的小手她也不抗拒,只是要抹一抹囗水:-) 令甘家上下也很高興。

除咗行為上討人歡喜，甘怡說話也越來越甜
１"我想去姨婆度，掛住姨婆。"
２"同媽媽玩開心ｄ。"
３同媽媽影完相:"影多張丫"

記憶力也好了，自從爺爺教了她一次"三字經"，加上媽媽每天再教，她已背到頭十句。去過的地方和做過的事情她也記得，重識得係啱時間講返出嚟。
甘怡也明白父母不同的責任，識得"爸爸返工揾錢畀媽媽買玩具畀甘怡",好像開始明白有種東西叫"錢"，或者是因為媽媽成日講啩。

我成日整古佢，她一向都鍾意食嘢，但人大了開始識"扮飽"去逃避食剩飯，我就會問佢"食唔食蛋/雪糕呀?"佢當然會話要啦，咁我就問佢:"你又話飽嘅?"

不過甘怡依然是一個緊張大師， 還是經常 發脾氣，我還找不到她的規律，大約是有事情做不到就會，但明明許多東西她已經做得到，她會忽然會不到然後喊(著襪),難道女仔都是善變?
這兩個月的變化真的大，我常同女兒(及老婆)講，"你大個女啦，唔係bb係小朋友啦，唔可以再咁扭計" 呢句說話間中可以令她聽話，但多數時候還是不管用。